Isuzuma ry’ishyirwa mu bikorwa ry’imihigo y’umwaka wa 2007 ryakozwe hagamijwe kubona Uturere tubiri twa mbere mu rwego rw’igihugu ryagaragaje ko Akarere ka Nyagatare ari ko kegukanye umwanya wa mbere. Ni muri urwo rwego, ku itariki ya 4/01/2008, abaturage b’Akarere ka Nyagatare bagize ibirori byo kwishimira igikombe ako Karere kabonye. Umushyitsi mukuru muri ibyo birori akaba yari Nyakubahwa Minisitiri w’Ubutegetsi bw’Igihugu, Imiyoborere Myiza, Amajyambere Rusange n’Imibereho Myiza y’Abaturage, Musoni Protais.
Ijambo Minisitiri Musoni Protais yagejeje ku baturage muri ibyo birori ryibanze ku bintu bigomba gushyirwamo imbaraga muri uyu mwaka wa 2008. Ibyo bikaba ari ukongera umusaruro, kuzigama no kwibumbira mu makoperative, imiturire mu midugudu no kubonera abatishoboye icumbi.
Ku byerekeye kongera umusaruro, Minisitiri Musoni Protais yasabye abaturage gushyira imbaraga muri gahunda yo kongera umusaruro w’ubuhinzi n’ubworozi. Kuri iyi ngingo abaturage basabwe gukoresha ubushobozi buhari no kububyaza umusaruro. Abaturage basabwe kandi kurenga umuco wo guhingisha isuka, bakitabira guhingisha imashini. Ibyo kugira ngo bigerweho bikaba bisaba guhinga igihingwa kimwe kandi kiberanye n’aho hantu. Minisitiri Musoni Protais yaboneyeho gusaba ko buri Murenge waba ufite umwaka utaha nibura uruganda rumwe kandi ruvuye mu maboko y’abaturage. Yasabye kandi abaturage kumenya guhindura ibyo bakora, bakabibyaza ibindi bintu, kugira umuco wo guhunika, kumenya gufata amazi no kuyakoresha neza.
Ku birebana no kuzigama, Minisitiri yakunguriye abaturage kugira umuco wo kuzigama, maze asaba ko buri rugo rugomba kugira konti muri banki kandi bakibumbira mu makoperative kugira ngo begeranye imbaraga, bityo bagere ku bintu byinshi kandi vuba. Yatanze urugero rw’Akarere ka Kayonza aho buri rugo rwagiye rutanga amafaranga 100, none ubu bakaba barashoboye kwigurira imodoka yo mu bwoko bwa Fuso ibafasha kugemura umusaruro w’urutoki rwabo i Kigali.
Ku byerekeye imiturire, yasabye abaturage ba Nyagatare guhindura imiturire. Yabasabye kurwanya nyakatsi no gutura mu midugudu kuko bituma ubuso bw’ubutaka bwo guhinga bwiyongera kandi n’ibikorwa by’amajyambere bikabageraho ku buryo bworoshye.
Ikindi Minisitiri Musoni Protais yasabye abaturage b’Akarere ka Nyagatare ni ukubonera abatishoboye icumbi. Yavuze ko buri Munyarwanda wese agomba kugira aho kuba, bityo aya mezi abiri ari imbere (Gashyantare na Werurwe), akaba agomba kurangira abacitse ku icumu batishoboye, abahejwe n’amateka n’abandi bafite inzu yo kubamo. Icyunamo kikaba rero kigomba gusanga ikibazo cy’icumbi cyaravuye mu nzira.
Minisitiri Musoni Protais yibukije kandi abaturage ko intego y’umwaka wa 2008 ari Isuku n’Umutekano mu rugo, rwo shingiro ry’imibereho myiza y’Abaturage. Kugira ngo ibyo bigerweho buri Mudugudu ukaba ugomba gufasha abaturage kugera kuri iyo ntego no kubafasha gushyira mu bikorwa imihigo buri rugo rwahize.
Minisitiri w’Ubutegetsi bw’Igihugu, Imiyoborere Myiza, Amajyambere Rusange n’Imibereho Myiza y’Abaturage, Musoni protais yarangije ijambo rye yongera gushimira abaturage b’Akarere ka Nyagatare umurava bakoranye besa imihigo ya 2007, ibyo bikaba byarabahesheje umwanya wa mbere mu rwego rw’igihugu. Kugira ngo bagumane iryo shema yabasabye gukomeza kurangwa n’ubwumvikane, ubufatanye mu kwikemurira ibibazo no gukora nk’abikorera. Yasabye kandi abayobozi mu nzego zinyuranye kureba imbere kugira ngo bafashe abaturage kwihuta mu iterambere.
Twabibutsa ko ku itariki ya 28/12/2007, ari ho Minisitiri w’Intebe yatangaje ku mugaragaro ibyavuye mu isuzuma ryakozwe mu Turere tubiri twa mbere muri buri Ntara n’Umujyi wa Kigali, hagamijwe kubona Uturere tubiri twa mbere mu rwego rw’Igihugu. Isuzuma ryakozwe mu Turere 10, ari two Gisagara, Nyamagabe, Nyamasheke, Rutsiro, Musanze, Gicumbi, Nyagatare, Gatsibo, Gasabo na Nyarugenge. Uturere tubiri twa mbere tukaba twarabaye Nyagatare yagize amanota 87, 3% na Musanze yagize amanota 87, 2%.
