Ku wa gatandatu itariki ya 23 Mutarama 2010 Nyakubahwa Minisitiri w’Ubutegetsi bw’Igihugu James MUSONI yasuye Abaturage b’Umurenge wa SAKE ho mu Karere ka NGOMA mu Ntara y’Iburasirazuba. Muri urwo ruzinduko, akaba yari kumwe n’Umujyanama wa Nyakubahwa Perezida wa Repubulika mu by’Ubukungu, Prof. NSHUTI Manasseh .

Umwaka ushize wa 2009, ubwo yasuraga Uturere dutandukanye, Nyakubahwa Perezida wa Repubulika yemereye abahinzi b’inanasi bo mu Murenge wa SAKE bibumbiye muri Koperative KOPANA inkunga y’imodoka izabafasha kugeza umusaruro wabo ku ruganda.

Ni muri urwo rwego ku wa 23 Mutarama 2010, mu Murenge wa SAKE habereye umuhango wo gushyikiriza iyi koperative impano y’imodoka bahawe na Nyakubahwa Perezida wa Repubulika, uyu muhango ukaba warayobowe na Nyakubahwa Minisitiri w’Ubutegetsi bw’Igihugu James MUSONI.

Minisitiri James MUSONI na Prof. NSHUTI Manasseh iruhande rw’imodoka Nyakubahwa Perezida wa Repubulika yahaye Koperative KOPANA yo mu Murenge wa SAKE

Ku ruhande rw’Intara y’Iburasirazuba, uyu muhango witabiriwe n’Umunyamabanga Nshingwabikorwa w’Intara MUGIRANEZA Yussuf, Umuyobozi w’Akarere ka NGOMA Wungirije, ushinzwe Imibereho Myiza y’Abaturage, Umunyamabanga Nshingwabikorwa w’Akarere ka NGOMA ndetse n’Abayobozi b’Ingabo na Police bakorera muri ako Karere. Hari kandi n’Abaturage bo mu Murenge wa JARAMA uhana imbibi n’Umurenge wa SAKE.

Minisitiri James MUSONI, Prof. NSHUTI Manasseh, Abayobozi bahagarariye Intara y’Iburasirazuba hamwe n’abanyamuryango ba Koperative KOPANA mu murima w’inanasi

Iki gihingwa cy’inanasi kimaze kugeza abanyamuryango ba Koperative KOPANA kuri byinshi. Muri byo twavuga: kwiyishyurira Mutuelle, kwikenura, kuguriza abandi amafaranga yo kwiyubakira amacumbi muri gahunda yo kurwanya nyakatsi, kuzigamira ejo hazaza n’ibindi…

Ubu, abanyamuryango ba Koperative KOPANA barateganya kwinjira muri gahunda y’Umurenge SACCO, bose uko bangana nta n’umwe usigaye inyuma. Iyi koperative ifite abanyamuryango 453, yatangiye guhinga inanasi ku buso bwa hegitari 19. Ubu zikaba zihinzwe ku buso bwa hegitari 81. Mu mwaka ushize wa 2009, babonye umusaruro ushimishije ugera kuri Toni 152 z’inanasi bakaba barashoboye kwinjiza akayabo k’amafaranga angana na 12, 160,000 y’u Rwanda.

Ku musaruro wabo, aba bahinzi b’inanasi bahabwa hagati y’amafaranga 100 n’amafaranga 120 y’u Rwanda gusa. Ariko kuba bashobora kwigereza umusaruro wabo ku ruganda bakoresheje imodoka biherewe na Nyakubahwa Perezida wa Repubulika, ntawashidikanya ko bazajya bagurisha inanasi zabo ku giciro cyiza.

Umuhigo w’abanyamuryango ba Koperative KOPANA n’uko mu minsi iri imbere ubuso bahingagaho inanasi buziyongera bukagera kuri hegitari 2000 kandi biyemeje kubigeraho kuko bivugira ubwabo ko bateze byinshi ku buhinzi bw’inanasi.

Nyakubahwa Minisitiri w’Ubutegetsi bw’Igihugu yagize icyo atangariza abari bitabiriye iki gikorwa. Ijambo rye rikaba ryarabimburiwe n’umuhango nyirizina wo gushyikiriza abanyamuryango ba Koperative KOPANA impano ya Nyakubahwa Perezida wa Repubulika igizwe n’imodoka yo mu bwoko bwa Daihatsu ifite agaciro k’amafaranga 19, 500,000 y’u Rwanda.

Afata ijambo, Nyakubahwa Minisitiri James MUSONI yagize ati : « Imvugo niyo ngiro », yongeraho ati : «Burya umugabo ni usohoza ubutumwa bw’abamutumye…», Abaturage nabo bunga mu rye baririmba, babyina ndetse iyo ndirimbo ikaba yaraherekejwe n’amashyi n’impundu bavuga bati : «…mu buhinzi Perezida KAGAME adutera inkunga ».

Minisitiri James MUSONI yifatanyije n’Abaturage ba SAKE kwishimira impano ya Nyakubahwa Perezida wa Repubulika

Nyakubahwa Minisitiri w’Ubutegetsi bw’Igihugu yagize ati: « Ubuyobozi ni ubwanyu ! Nyakubahwa Perezida wa Repubulika, abasura, yasanze mwarakoze igikorwa cyiza akaba ari muri urwo rwego yifuje kubagororera. Iyi modoka abahaye ni igishoro kizabaha ubushobozi bwo kwigurira n’izindi nyinshi ».

Amaze gushyikiriza koperative KOPANA imfunguzo ndetse n’ibyangombwa by’iyi modoka, Nyakubahwa Minisitiri James MUSONI yabagejejeho ubutumwa bwa Nyakubahwa Perezida wa Repubulika aho agira ati : iyi modoka ibe imbarutso y’amajyambere arambye. Yaboneyeho umwanya wo kubashyikiriza indamutso ya Nyakubahwa Perezida wa Repubulika aho abifuriza Umwaka Mushya Muhire wa 2010 akaba abifuriza ko wazababera uw’uburumbuke n’iterambere. Asoza ijambo rye, Nyakubahwa Minisitiri w’Ubutegetsi bw’Igihugu James MUSONI yabwiye abanyamuryango ba koperative KOPANA ko icyifuzo cye ari uko Nyakubahwa Perezida wa Repubulika yazagaruka kubasura agasanga barateye imbere muri byinshi ababwira ko yiteguye kubafasha igihe cyose bahuye n’ikibazo cyabangamira iterambere rya koperative yabo.

Ifoto y’urwibutso

Minisitiri James MUSONI, Prof. NSHUTI Manasseh, Yussuf MUGIRANEZA, Uhagarariye Ingabo, uhagarariye Police(i buryo) hamwe n’Abanyamuryango ba Koperative KOPANA: uwa kabiri iburyo, wambaye ishati ya bururu ni Perezida wa Koperative KOPANA, Bwana NIYIBIZI J. Bosco(ibumoso)

Ku ruhande rwabo, abanyamuryango ba Koperative KOPANA basabye Nyakubahwa Minisitiri James MUSONI kuzashyikiriza Nyakubahwa Perezida wa Repubulika indamutso yabo no kumushimira impano nziza yabageneye. Bagize bati : « Twasabye Nyakubahwa Perezida wa Repubulika umugeni, none aramuduhaye kandi umugeni twamusabye niwe yaduhaye koko. Twaramurambagije, turatebutsa…». Ibi bakaba barabivugiraga ko bagize uruhare mu kwitoranyiriza imodoka bashaka.